Megin áherslur í starfi Brúarskóla eru hegðun, félagsfærni og samskipti og því mikil áhersla lögð á hegðunarmótun. Unnið er með athafnir daglegs lífs í öllu starfi. Allt starf er vel skipulagt, skýrt og fyrirsjáanlegt.

Leiðir að markmiðum í vinnu með hegðun eru meðal annars:

• ART (Aggression replacement training)
  • Reiðistjórnun
  • Félagsfærni
  • Klípusögur
• Styrkja jákvæðar hliðar
• Hrós
• Hvatning, allir nemendur eru með hvatningakerfi
• Nemendur læra að taka ábyrgð á eigin hegðun
• Nemendur læra nýja hegðun í stað þeirrar gömlu
• Sjónrænt skipulag
• Allar reglur myndrænar og sýnilegar, æfðar reglulega og afleiðingar við reglubrotum skýrar
• Jákvæð samskipti og virðing

Í námi er áhersla lögð á sjálfstæði í daglegum athöfnum, íslensku, stærðfræði, ensku, hreyfingu, útivist, samfélagsgreinar og list- og verkgreinar. Útivist er fastur liður í starfinu og nýtir skólinn umhverfi sitt og útikennslustofu í Öskjuhlíðinni, Brúarrjóður.

Nemendur í Vesturhlíð eru í íþróttum í íþróttahúsi Klettaskóla. Nemendur í þátttökubekkjum fara í íþróttir, verkgreinar og mötuneyti í samstarfsskólunum, Brúarsel í Ingunnarskóla og Brúarhús í Húsaskóla. Brúarskóli er heilsueflandi grunnskóli og tekur daglegt starf mið af því.

Starfsmenn eru með nemendum allan skólatímann og borða með þeim morgun- og hádegismat.